Leita í fréttum mbl.is

Merkilegar myndir

Merkilegar teikningar af íslenskum fuglum og flækingsfuglum eru komnar fram og verða til í bók eftir eitt ár. Ekki er langt síðan að plöntubók með teikningum eftir Eggert Pétursson kom út og hlaut silfurverðlaun nú fyrir stuttu á erlendri grund.

Teikningar Benedikts eru merkilegar fyrir  þær sakir hvað það er langt síðan þær voru gerðar og hvernig þær hafa legið eins og hvert annað handrit á Náttúrufræðistofnun í 100 ár.

Karlinn hefur verið meistari á teiknisviðinu og kannski hefði hann lagt heiminn að fótum sér á listabrautinni ef hann hefði opinberað þessa getu - í staðin kenndi hann í lærða skólanum og mér sýnist hann aldrei hafa kvænst eða eignast börn.

Það verður spennandi að skoða þessar myndir!


mbl.is Fuglahandrit Benedikts Gröndals gefið út að ári
Tilkynna um óviðeigandi tengingu við frétt

Sorglegt

Þetta er verulega sorglegt.

Vonandi  fá þessar blessaðar manneskjur útrás og fróun í þessu sem getur hjálpað þeim eitthvað sem frömdu þennan gjörning.

Sem betur fer eru til myndir af þessu verki og nú er um að gera að taka það fyrir og setja upp sýningu í staðin af nautinu í uppbyggingu til endaloka og nýta allan þann kraft sem komið hefur að þessari vinnu í jákvæðum skilningi svo sorgin ein verði ekki eftir í hugum barnanna og foreldra þeirra sem stóðu að þessari sköpun!

Búa til nýja sýningu - ljósmyndir á stórum fleti og sýningu takk!


mbl.is Brann til kaldra kola
Tilkynna um óviðeigandi tengingu við frétt

Hingað erum við þá komin - gjaldþrot?

Svartsýni er staðreynd. Mér dettur ekki í hug að reyna breiða yfir það. Hvað varðar peningafjárhirslur Íslendinga er ekkert vit í þeim lengur, nú er best að sofa á peningum sínum því fjandinn er skammt undan.

Allir peningar út úr bankanum, minnsta kosti þeim sem hægt er að ná - næsta skref er greinilega alþjóða hjálp með matargjöfum og alles - þetta er eins og eftir atómsprengju!

Hvað ætla menn að þrjóskast lengi við - leyfum erlendum ráðgjöfum og sérfræðingum að hjálpa okkur til að hreinsa fjandann svo mikið sem hægt er.

Gjaldþrot Íslendinga hefur aldrei verið eins nálægt, ef það er ekki komið, ég tala nú ekki um ef ríkisstjórnin springur eða kannski það sé kannski það eina rétta?

Opnið augun almenningur og takið þátt og afstöðu í okkar eigin málum, eigum við að byrja frá grunni eins Argentína og eiga yfir okkur sambandsleysi annarra þjóða í heiminum kannski næstu tvo tugina eða lengur?

Prófið að setja augu og eyru í stöðu þeirra manneskju sem býr í Hollandi, Englandi, Svíþjóð eða annars staðar í heiminum og horfið á Ísland og hlustið á það sem sagt er í þessum löndum.


mbl.is Undirbúa lögsókn gegn Íslandi
Tilkynna um óviðeigandi tengingu við frétt

Hver ræður?

Hvernig er hægt að neita manneskjum um læknisrannsókn? Það er ekki eins og sé um aðgerð að ræða!

Þetta er eitt margra dæma um ótrúlegt vald sem heilbrigðisstéttir eins og læknar hafa yfir fólki, það verður að vera val um þessa hluti eins og annað. Það á ekki að þurfa einkareka sjúkrahústæki til að fólk fái þá þjónustu sem það vill, eða hvað?

Þess þarf kannski.

Ég á eina sögu af sivpaðri reynslu með barn, en barnið dó ekki sem betur fer.


mbl.is Gleypti litla rafhlöðu og lést
Tilkynna um óviðeigandi tengingu við frétt

"Kvennaklósettið" til alls fyrst!

Marlyn French búin að yfirgefa þessa jarðvist - hún átti einn stærsta þátt í því að styðja konur um allan heim með bók sinni Kvennaklósettinu sem kom út 1977, í baráttunni við félagslegri kúgun kvenna inni á heimiliunum.

Verst er að bókin hefur verið bæði gleymd og geymd og er því ástæða að taka hana aftur fram eins og ég gerði áðan til að minna mig á ýmislegt, en ég sé að ég verð að lesa hana aftur, svo margt er horfið frá mér.

Seinna kom svo bókin "Þótt blæði hjartasár" og var hún ekki síðri þótt ekki hafi fylgt eins miklar sprengingar með henni,

Þegar ég leit í endi Kvennaklósettsins núna, þar er komið er inn á "gleymskuna" sem túlkuð er sem andstæða sannleikans.

En síðustu orð bókarinnar eru svona:

Ég hef opnað allar gáttir í huga mínum.

Ég hef opnað allar holur í hörundi mínu.

En hafaldan ein fellur að


mbl.is Marilyn French látin
Tilkynna um óviðeigandi tengingu við frétt

Spurningin er:

Skila styrkþegar styrkjum eftir að þeir eru búnir að njóta þeirra?

Er hægt að láta peningana renna til hjálpar- eða líknarstarfa?

Á ríkissjóður að fá peningana?

Ekki get ég svarað þessum spurningum en eitt er víst að ekki mundi ég hika við að nota þá frekar til uppbyggingu lands sem er hægt að gera á ýmsa lundu og láta ógert að skila þeim til þrotabúa!

"Ásgerður Jóna Flosadóttir, formaður Fjölskylduhjálpar Íslands skorar á Bjarna Benediktsson, formann Sjálfstæðisflokksins, að láta 55 milljóna styrki frá FL Group og Landsbankanum renna til Fjölskylduhjálparinnar í stað þess að skila fjármununum til þrotabúa fyrirtækjanna."


mbl.is Styrkir stórfyrirtækja til nauðstaddra
Tilkynna um óviðeigandi tengingu við frétt

Jóhanna

Ég tek undir með Össuri, Jóhanna þarf að vera formaður flokksins hvort sem það verður í styttri eða lengri tíma.

Hún verður einfaldlega að taka við.

Ekkert meir um það að segja.


mbl.is Össur biðlar til Jóhönnu
Tilkynna um óviðeigandi tengingu við frétt

Þetta er erfitt

Auðvitað veit ég að maður kemur í manns stað - en sé engan sem sem mig langar virkilega að hafa í staðin fyrir Ingibjörgu!

 Kannski Dag, veit það ekki, Jóhanna er góð, en hún hefur sagt að hún sækist ekki eftir formanninum. Mig langar að hafa konu fyrir formann og ég gæti hugsað mér Steinunni Valdísi hún er yndi.

Hvað með Steinunni og Dag?

Ég sé mikið eftir Ingibjörgu en þetta er líka gott, ástandið er flókið, hún er einn af blórabögglum bankahrunsins og krafan er frekar fersleiki en reynsla. 

Múgurinn er með ofvirkni sem þýðir að það er ekki hægt að slaka á og líta til baka - það á allt að gerast strax, svona er Ísland í dag.


mbl.is Ingibjörg Sólrún hættir
Tilkynna um óviðeigandi tengingu við frétt

Ingibjörg Sólrún hefur þó gert eitthvað!

 Ástæða er til að vekja athygli á þessum vel skrifaða pistli Guðmundar Andra Thorssonar. Ingibjörg Sólrún komst í hann krappan að móðga þjóðina, en umburðarlyndið sem hún fær fyrir allt það góða sem hún hefur gert fyrir þjóðina er grafið og gleymt á svona stundum. Ágætt að láta minna sig á og draga fram kosti fólks í allri neikvæðninni sem hefur tröllriðið samfélaginu.

 Fréttablaðið, 02. mar. 2009 06:00

Gangan langa

mynd

Guðmundur Andri Thorsson. skrifar:

Ógleymanleg verður manni myndin af Ingibjörgu Sólrúnu Gísladóttur þar sem hún er studd út af heimili Geirs Haarde af Össuri Skarphéðinssyni, sínum nánasta samverkamanni - og hafði risið af sjúkrabeði sínum til að bregðast við kröfu kjósenda um nýja ríkisstjórn, nýja forystu í landsmálum, ný úrræði. Að fara nú að gera eitthvað og hætta þessu ráðleysi.

Þetta er ein af myndum hrunsins. Þetta er eitt af augnablikunum. Eftir á er eins og ráðherrarnir hafi verið í miðju taugaáfalli - ekki síst Geir Haarde sem öllum spurningum svaraði með: „nei nei, alls ekki, auðvitað ekki, nei nei, við viljum bara fá vinnufrið."

Þetta er sterk mynd: Gangan langa. Maður sér hana fyrir sér þar sem hún gekk hægt og hetjulega skref fyrir skref út úr þessari ríkisstjórn á vit óvissunnar og studdist við styrkan arm Össurar og eigin vilja og ekki fór á milli mála hversu brothætt hún var og sterk - útkeyrð og einbeitt.
Þessa daga var djarft teflt og vel. Og Ingibjörgu Sólrúnu og samverkafólki hennar tókst að skapa nýja stjórn og leiða til öndvegis Jóhönnu Sigurðardóttur, sem á það öðrum fremur skilið að verða fyrsta konan til að sitja í stóli forsætisráðherra og blómstrar í starfinu - og virkja til starfa Vinstri græn, spriklandi af fjöri og athafnaþrá.

Sagt er að Ingibjörg Sólrún hafi ekki axlað sína ábyrgð. Jafnvel heyrast raddir - til dæmis frá síðbúnum Samfylkingarmönnum - sem tala eins og hún hafi fyrirgert kjörgengi sínu, megi ekki bjóða sig fram í annað sæti á lista Samfylkingar eða til formanns. Ég veit það ekki.

Brást hún? Henni voru vissulega mislagðar hendur í utanríkisráðherratíð sinni; gerði að sinni vonlausa oflátungsbaráttu Halldórs Ásgrímssonar fyrir sæti í Öryggisráðinu, gekk of langt í að leggja nafn sitt og þjóðarinnar við athafnir íslenskra fjárglæframanna þegar hún sat með þeim á örvæntingarfullum blaðamannafundi í Danmörku. Og átti víst fundi með Davíð Oddssyni og Geir Haarde í aðdraganda hrunsins þar sem Davíð virðist nánast hafa verið í hlutverki Kassöndru úr grísku goðafræðinni, en sú bölvun hvíldi á Kassöndru að hún sá allt fyrir en enginn trúði spádómum hennar (sem sýnir aftur hversu rangur maður Davíð var sem Seðlabankastjóri).

En Ingibjörg Sólrún gerði líka ýmislegt vel í ráðherratíð sinni, stöðvaði smánarlegan stuðning Íslendinga við Íraksstríð Bushstjórnarinnar, fordæmdi framferði Ísraelsmanna, beindi utanríkisstefnu landsins frá áralangri fylgispekt við Bandaríkjamenn og leitaði samhljóms við frændþjóðir.

(Reyndar er það ráðgáta hvers vegna svo mikil fremd þykir að vera utanríkisráðherra - er það ekki leif frá þeirri tíð þegar stórkostleg upphefð þótti að geta farið til útlanda og fengið bjór og Toblerone?)

Brást Ingibjörg Sólrún? Hefur hún fyrirgert foringjahlutverki sínu? Sjálfum finnst mér full snemmt að skera úr um um það.

Fyrri ríkisstjórn var ekki snjallræði þó að svo kunni að hafa virst að hún væri sú eina sem staðan bauð upp á eftir óljós úrslit síðustu kosninga, og flestum hafi virst þá sem þau Geir Haarde og ISG sýndu þroska og stjórnvisku að gera hið besta úr snúinni stöðu. En þetta var pattstjórn. Ákvörðunum var slegið á frest í uppgerðarsamlæti afla sem eiga að takast á og vera okkur kjósendum andstæðir valkostir. Hafi stjórnin haft eitt sögulegt hlutverk var það að koma Íslandi í ESB og leiða okkur frá Laissez-faire-stefnu Davíðstímans - frjáls-æðinu - en það var greinilega til of mikils mælst.

Sjálfstæðismenn voru ekki tilbúnir. Ekki heldur að halda áfram á Davíðsbraut. Það var eins og þeir segðu í sífellu: Æ getum við ekki talað um þetta á morgun…

Einna jákvæðast við næstu kosningar er að flokkarnir komast ekki lengur upp með þann dónaskap við okkur kjósendur að „ganga óbundnir til kosninga". Skýrir valkostir eru nú í fyrsta sinn síðan 1956: Annaðhvort vinstri stjórn Samfylkingar og VG eða hægri stjórn Sjálfstæðis-flokks og Framsóknarflokks. Þegar Höskuldur hugðist sýna Sigmundi Davíð hver væri sterki maðurinn í litla hægriflokknum var útkoman að sjálfsögðu sú að Framsókn verður ekki treyst til annars en gamalkunnra refja.

Brást Ingibjörg Sólrún? Hún brást að minnsta kosti við. Hún sagði af sér ráðherradómi og skapaði nýja stjórn áður en hún fór heim að sofa. Hún reyndi að starfa af heilindum í vonlausri ríkisstjórn en tók af skarið um síðir og sýndi hvers konar leiðtogi hún er: leiðtogi sem hlustar - og bregst við.
Slíkur leiðtogi á að minnsta kosti rétt á því að bera það undir kjósendur hvort þeir vilja veita henni brautargengi.


En eitt dæmið um hvernig konur hafa vitið fram yfir karla!

Ásta er kona og vonandi getur hún eða hefur hún fundið leiðina að hjarta sjálfstæðisflokksins til kæfa niður þann risarembing sem átt hefur sér stað í röðum karlanna innan flokksins.

Hún fær prik hjá mér fyrir þetta.

Vonandi taka fleiri konur hana til fyrirmyndar og vaði ekki áfram í blindgötum karla sem konur þurfa alltaf að endurreisa og leggja á brjóst.


mbl.is Baðst afsökunar á mistökum
Tilkynna um óviðeigandi tengingu við frétt

Næsta síða »

Höfundur

Edda Agnarsdóttir
Edda Agnarsdóttir
Veðrið og lund mín eiga lítið saman að sælda. Ég á mína þoku og blíðviðri inni í mér.
Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband