Eitt ár og meira eða fjórtán dagar.

 Þann 9. febrúar 2007 birti ég fyrstu bloggfærslu mína undir fyrirsögninni: JA HÉRNA, NÚ ÞYKIR MÉR TÍRA Á SKARINU.

Þetta var smáminning um ömmu mína sem hafði mikil áhrif á mig sem barn. Hún kenndi mér að prjóna, las fyrir mig sögur, gaf mér kandís, kom með gull og gersemar frá Ameríku eftir heimsóknir til fósturdóttur sinnar, var haldreipi mitt og systkinanna í húsinu, ég fékk að gramsa hjá henni í skápum og máta föt og svo var hún sérstaklega góð við mig á táningsngsárunum. Ég byrjaði minn búskap í íbúðinni hennar sem hún bjó í síðustu árin í húsinu hennar og afa þar sem voru fimm íbúðir og hún var komin í minnstu íbúðina. Amma Helga fór á Hrafnistu í Laugarási og lést þar.

Hún var ljósmóðir og tók á móti börnum í heimahúsum, hún lærði ljósmóðurfræðin í Danmörku og þótti gott kvonfang fyrir afa sem var ekkill og átti 4 börn. Þau eignuðust ekkert barn en ólu upp að hluta sonarson afa og tóku eina fósturdóttur sem giftist til Ameríku.

Ég man eftir því að það var talað um ömmu að hún væri óbyrja, þetta heyrist ekki í dag.

"Það var stjúplangamma mín Helga Sigurðardóttir ljósmóðir sem notaði þessa setningu "Nú þykir mér tíra á skarinu" oftar en ekki á mínum uppvaxtarárum. Mér fannst hún passa ágætlega við í þessu tilfelli þegar ég fer af stað með fyrstu bloggfærsluna.

Annars var hún oft kölluð Ljósa af þeim börnum sem hún tók á móti og þekkti ég þá nafngift vel því faðir minn kallaði hana aldrei annað. Það fer vel á því að minnast hennar ömmu með þessum hætti því ljósið tírði oft í kringum hana."

Athugasemdir

[Anna Einarsdóttir, 24.2.2008 kl. 13:50]

Falleg minningarorð um ömmu þína Edda mín. 

[Kolgrima, 24.2.2008 kl. 14:51]

Ljósmóðir og ljósa eru með fallegustu orðum íslenskrar tungu - lýsir svo mikilli fegurð og bjartsýni hjá þjóð sem einu sinni lifði lungan úr árinu í eilífu myrkri.

Þetta er falleg kveðja til ömmu þinnar. 

[Ásdís Sigurðardóttir, 24.2.2008 kl. 15:26]

Já, þetta eru sko falleg orð ljósa/ljósmóðir. Vel skrifað um ömmu þína.  Til hamingju með daginn mín kæra. 

[Ingibjörg Friðriksdóttir, 24.2.2008 kl. 19:17]

[Hrafnhildur Ýr Vilbertsdóttir, 24.2.2008 kl. 20:56]

Falleg orð um ömmu þína....svo er orðið ljósa mjög fallegt orð.

Til hamingju með daginn

[Fríða Eyland, 25.2.2008 kl. 01:53]

Amma sagði oft nú þykir mér tíra, annars fannst henni notalegt að prjóna í rökkrinu.

[Ólöf Jóhanna Pálsdóttir, 26.2.2008 kl. 17:18]

Ein ömmusystir mín var ljósmóðir (ljósa) Hún var gift en átti engin börn, en ól upp tvær stúlkur. Til hamingju með daginn.

[Marta B Helgadóttir, 26.2.2008 kl. 21:10]

Nú Þykir mér tíra á tíkarskarinu... þannig var þetta sagt á mínu uppvaxtarheimili.

Falleg orð um ömmu þína.

[Ásta Björk Hermannsdóttir, 26.2.2008 kl. 23:20]

Rosalega falleg orð um hana ömmu þína

Margar góðar minningar sem þú átt um hana. 

[Jenný Anna Baldursdóttir, 27.2.2008 kl. 08:46]

Elsku Edda mín.  Þakka þér fyrir allar kveðjurnar.  Þessar formæður okkar voru engar geðluðrur og vesalingar.  Þær voru salt jarðar.  Við erum þeim að þakka.  Til hamingju með bloggafmælið.  Átti mitt á Vogi.  Hm...

Loveu

[Edda Agnarsdóttir, 27.2.2008 kl. 13:40]

Takk Jenný mín sömuleiðis - mér finnst dáldið sérstakt að við höfum báðar verið með langömmur með Helgu nafninu!