Námskeið í nýsköpun barna og þrívíddarhönnun

Var að koma af námskeiði í þrívíddarhönnun og nýsköpun fyrir nemendur í grunnskóla (og alla) með forritinu Prodesktop. Var námskeiðinu í allan dag og í gær frá 15 - 19.

Námskeiðið gekk m.a. út á það að finna þarfir á  vandamálum og vinna að tæknilegri lausn þess. Þetta er bæði hluti af mínu starfi og áhugamáli,  skapandi vinna með börnum og hugmyndavinna. Þótt ég hafi kennt núna á annan vetur heimilisfræði að þá gefst þar tækifæri til að láta krakka vinna skapandi eins og t.d. að rétta þeim eitthvert hráefni sem þau vinna máltíð úr. Þetta reyndi ég síðasta vetur með góðum árangri.

Annars er ég myndmenntakennari og kenni aðeins tveimur bekkjum í vetur myndmennt. Þau eru því miður of ung til að byrja á þessu verkefni sem ég var á námskeiði í en ýmsar hugmyndir þjóta nú fram hjá litlu nemendum okkar sem hægt er að grípa ef kennarar eru með hugann við það.

Ég hlustaði á innlegg í þættinum Stjörnukíki í gær á Rás 1 um skóla sem stofnaður var 1993  af arkitektum og myndlistarfólki  í Helsingi Finnlandi. Skólinn heitir Arki (veit ekki hvort þetta er rétt skrifað) og hefur einn af stofnendum skólans Pila Meskanen verið hér á landi og haldið fyrirlestur í tengslum við sýningu á byggingarlist á Kjarvalsstöðum. Fyrirlestur hennar hét "Nám og leikur" þar sem byggingarlist og manngert umhverfi eru aðalviðfangsefni nemendanna og segir hún að börn hafi mikinn áhuga á byggingarlist og meira segja djúpstæðan.

Skólinn er fyrir börn frá aldrinum 3 - 17 og í náminu er fléttað saman sögu, trúabragðafræði, stærðfræði og myndlist.  Leikur og ímyndunarafl,  skapa gegnum leikinn og  tilraunamennsku sem  er m.a byggt á kenningum Reggio Emilia. Markmið skólans eru að nemendur fá að kynnast sinni eigin arfleifð og byggingalist. Skólinn er meira á heimspekilegu nótunum og þar hefur enginn rangt eða rétt fyrir sér og vinnur ekki út frá þeim niðurstöðum þar sem skólar kanna rétt og röng svör. Hægt er að hlusta á þetta innlegg hér:

http://dagskra.ruv.is/streaming/ras1/?file=4358780

Athugasemdir

[Gísli Baldvinsson (IP-tala skráð) 17.11.2007 kl. 19:27]

Guð sé lof að það sé farið að örva sköpunargleði barna og öll námskeið og innlegg eru til góða. Við höfum útskrifað of mikið af staðreyndastúdentum. Finnarnir eru "ljósár" á undan okkur í skólastefnu. Takk f. innleggið Edda.

[Ingibjörg Friðriksdóttir, 17.11.2007 kl. 19:46]

Takk fyrir þetta innlegg

[alva (IP-tala skráð) 17.11.2007 kl. 19:56]

Athyglisvert, grunnskólinn er orðinn svo mikið fjölbreyttari en hann var þegar ég var í grunnskóla, enda eru svona 100 ár síðan ég var í skólaég sé í gegn um nám dóttur minnar sem er í 3ja bekk, hvað þetta hefur breyst.  Henni finnst alltaf svo gaman og spennandi í skólanum. En þetta er rosalega sniðugt. Þrívídd, nýsköpun, forrit, þetta er spennandi, vona að einhver frá Blönduósskóla hafi verið þarna.

[Jenný Anna Baldursdóttir, 17.11.2007 kl. 23:12]

Takk fyrir þennan frábæra pistil.  Það er svo mikið að gerast í menntununarmálum barna, amk í löndunum í kringum okkur.

[Anna Ólafsdóttir (anno) (IP-tala skráð) 18.11.2007 kl. 00:13]

Mikið hlýtur að hafa verið gaman hjá þér að kynnast öllum þessu nýju hlutum.  Ég er svo heppin að tvær samstarfskonur mínar eru afskaplega vel að sér um allt sem lýtur að Reggio Emilia. Ef ég ætti barn á leikskólaaldri myndi ég vilja að það fengi að vera í leikskóla byggðum á þeirri hugmyndafræði.  

[Edda Agnarsdóttir, 18.11.2007 kl. 01:28]

Ann, eg er hæstánægð með þetta námskeið sem ég var á og minnti mig á þær góðu stundir sem ég átti við kennslu í 7 ár samfleytt með sömu nemendur og margt af því sem ég vann með þeim var í anda Reggio Emilia enda féll ég fyrir kenningum hans á námsárum mínum í DK.

Gunnar , - frábært að heyra þetta, þetta hefur örugglega verið systir þín Svanborg sem kenndi mér í gær, það eru ekki margir að doktera um þessi mál og svo var Gísli Þorsteinsson með henni og hann er líka doktorsnemi.

Jenný, skólinn í Finnlandi sem ég skrifaði um er alfarið einkaskólo og nem. koma bara einu sinni í viku eftir sitt hefðbundna skólanám. Vinsældir skólans frá byrjun hafa verið geysi miklar eða úr 20 fyrsta árið upp í 800 núna.

Alva það er yndislegt að heyra að dóttur þinni finnist gaman í skólanum þvæi það eru alls ekki öllum börnum sem finnst það.

Takk sömuleiðis fyrir innlitið Ingibjörg mín.

Gísli, Finnarnir hafa gert margt gott en hins vegar runnu á mig tvær grímur eftir að ég hlustaði á Hafstein Karlsson skólastjóra lýsa því í útvarpsviðtali hvernig hann upplifði skóla og kennslu í Finnlandi  sem var ná þá leið m.a. að í kennslustundunum hjá þeim sá hann aldrei nemanda með sérþarfir eða frávik! Þá fór maður að hugsa um allar fínu tölurnar sem koma frá Finnlandi og hvernig þeir þjóna þessum nemendum. Hafsteinn hefur verið gestanemandi við Háskólann í Finnlandi og er að vinna að meistararitgerð sinni um saman burð á okkar skólum og finnskum.

[Gísli Baldvinsson (IP-tala skráð) 18.11.2007 kl. 21:18]

Mig grunar að nemendur og frávik heyri sögunni til hér á landi. Það stefnir í svokallað einstaklingsmiðað nám og þar eru viðmið önnur hvað svo sem álit manna sé á því.

[Ásdís Sigurðardóttir, 18.11.2007 kl. 22:55]

Innlitskvitt.  Flottur pistill. Börn er svo snemma svo móttækileg,mér hefur alltaf fundist Íslendingar byrja of seint með alls kyns nám. 

[Sunna Dóra Möller, 19.11.2007 kl. 16:43]

Þetta hljómar mjög spennandi! Takk fyrir pistilinn, mér finnst þetta mjög áhugavert !

[Svanborg R. Jónsdóttir (IP-tala skráð) 19.11.2007 kl. 19:19]

Kærar þakkir Edda fyrir innleggið um nýsköpunar námskeiðið. Það er jafn gaman að kenna áhugasömum kennurum og krökkum sem manni tekst að "kveikja í" sköpunargleði og löngun til að læra meira.

Ég ætla að smella hér inn slóð á bloggið okkar í Félagi íslenskra kennara í nýsköpunar- og frumkvöðlamennt http://fiknf.blog.is/blog/fiknf/ og annarri með grein um nýsköpunarkennslu í grunnskóla ef einhverjir hafa áhuga á að kynna sér meira http://netla.khi.is/greinar/2004/002/prent/index.htm

Svanborg

[Ingibjörg Friðriksdóttir, 19.11.2007 kl. 20:45]

Lét verða að því að hlusta á pistilinn á linknum.  Vildi óska að hægt væri að taka piltana sem stunda veggjakrot og kenna þeim, hvernig hægt er að gera listaverk með spraybrúsanum.  Kannski þeir létu krassið þá vera.  Því miður er þó nokkuð um það í mínu hverfi að krotað og krassað sé á skóla og verslunarbyggingar, svo er þeir einnig farnir að ráðast á tréverk, skjólgirðingar og fl.

[Páll Jóhannesson, 19.11.2007 kl. 22:54]

Innlit og kvitt.

[Gísli Bergsveinn Ívarsson, 20.11.2007 kl. 11:24]

Ég ætla að segja eins og Páll.

Innlit og kvitt

[Ólöf Jóhanna Pálsdóttir, 20.11.2007 kl. 12:18]

Takk fyrir pistilinn Edda. Þetta hefur verið fróðlegt og lærdómsríkt námskeið. Ég er nú svoleiðis gerð að ég hef áhuga fyrir að fræðast og læra og tel engan of gamlan til þess.