Gulrótarbollur og annað góðgæti.

Þessa dagana er ég að kenna 4. og 5. bekk heimilisfræði. Námsefnið hjá þeim er uppfullt af góðum uppskriftum sem eru ef til vill allt of lítið notað á heimilum þessa lands, því loksins þegar nemendur eru komnir heim með heildarnámsefnið er komið vor og sumar og ekki eins mikill áhugi fyrir bakstri og fleira.

Ég ætla að setja inn að gamni það sem er að gerast í flestum skólum á landinu með þennan aldurshóp í Heimilisfræði.

Krakkarnir í 4. bekk búa sér til gómsætar samlokur með túnfisks salati. Hræra saman einni dós af sýrðum rjóma og einni dós af túnfiski í vatni, (sigta vatnið frá) ásamt tveimur teskeiðum af sætu sinnepi, einni teskeið af hunangi og hálfu niðurbrytjuðu epli. Salatið sett á sneið af fjölkornabrauði og salatblað ofan á eða eitthvað annað blaðkál sem til er og svo aðra sneið ofan á. Hér er komin gómsæt samloka. Nota svo hugmyndaflugið og breyta um bragðefni eftir dagsforminu.

Gulrótarbollur eru viðfangsefni 5. bekkjar. Stillið bakaraofnin á 50. Einn og hálfur dl. heitt/volgt vatn og tvær og hálf tsk. þurrger eða 15 til 20 g af blautgeri. leysa upp. Hálfur dl mjólk og hálfur súrmjólk, ásamt hálfri tsk. salt, einni tsk hunang, þremur msk af matarolíu blandað saman.

Fimm dl. hveiti og einn dl hveitiklíð ásamt tveimur msk söxuðum valhnetum (má sleppa) og einni rifinni gulrót sett í aðra skál og blandað saman. Þurrefnum blandað saman við blautefnin og slegið saman með sleif og sett á borð og hnoðað. Einn dl. hveiti aukreitis til að hnoða upp í.

Skipta deiginu í þrennt og úr hverjum hluta eiga að koma sex bollur, svolítið misjafnt, oft minna. Hækka hitastig ofns upp í 200 og baka bollurnar í ca 20 mín.

Verði ykkur að góðu.

 

Athugasemdir

[Jenný Anna Baldursdóttir, 14.9.2007 kl. 11:12]

Fyrst spyr ég: hvernig bragðaðist laxinn hjá Ingu og Moby?  Er engan lax búin að borða í sumar, því ég legg ekki eldislax mér til munns.

Takk fyrir gulrótarbollu uppskrift.  Nota þær uppskriftir frá þér, sem ég hef fengið fram að þessu grimmt.

Þú mátt gjarnan halda áfram að deila leyndardómum heimilisfræðinnar með þér.  Ég er að minnsta kosti áskrifandi.

Koss og knús

[Páll Jóhannesson, 14.9.2007 kl. 12:45]

Girnilegt, takk fyrir

[Heiða Þórðar, 14.9.2007 kl. 14:38]

Prófa ekki spurning. TAKK.

[Halldór Egill Guðnason, 14.9.2007 kl. 14:41]

Takk fyrir þetta Edda.

[Þorsteinn Ingimarsson (IP-tala skráð) 14.9.2007 kl. 23:32]

Þegar ég var í heimilisfræði í gagnfræðaskóla fyrir nokkrum árum síðan , þá lærði ég að baka eina köku sem var brúngrá á litinn,átti að vera kryddkaka held ég. Steikja einn kjötbita og svo að leggja á borð og vaska upp. Ekkert meira. Það var ekkert svona fancý eins og þetta er í dag.

[Marta B Helgadóttir, 14.9.2007 kl. 23:53]

Takk Edda, ég prófa þetta alveg örugglega

[Ólöf Jóhanna Pálsdóttir, 15.9.2007 kl. 14:31]

Takk fyrir Edda, ég prufa þessa girnilegu uppskrift þína.

[Edda Agnarsdóttir, 15.9.2007 kl. 20:22]

Jenný mín laxinn var góður.

þorsteinn eru bara nokkur ár síðan þú varst í gaggó?

Takk fyrir innlitið öll. Jenný ég kem örugglega með eikkað meira!

[Jóna Á. Gísladóttir, 16.9.2007 kl. 14:39]

Gulrótarbollur! Aldrei heyrt um þetta. Þetta þarf ég að geyma með mér þar til andinn kemur yfir mig. Túnfisksalatið virkar snilld. Hollt og gott. Ekkert majo og sollis viðbjóður

[Anna Ólafsdóttir (anno) (IP-tala skráð) 16.9.2007 kl. 15:22]

Ég fæ aldrei nóg af uppskriftum, er endalaust að prófa eitthvað nýtt. Þessar verða prentaðar út og settar í möppuna góðu. TAKK

[Ásta Björk Hermannsdóttir, 16.9.2007 kl. 22:55]

Vá þetta ætla ég að prufa.

Hef komist að því að það er fullt af skemmtilegum og góðum uppskriftum í felum í heimilisfræðinni...