Þreyta

Nú er ég orðin svo þreytt að ég get varla beðið eftir páskafríinu.

En svona til að afþreyta sig stunda ég líkamsrækt í formi leikfimi og dans hjá Jazzballetskóla Báru í Reykjavík. Þetta er fimmta árið sem ég sæki leikfimi til Reykjavíkur og höfum við verið fjórar til fimm saman og skiptumst á að aka. Þar eru frábærir kennarar sem hafa kennt okkur í gegn um árin og það er á engan hallað þótt ég nefni nokkra sem við höfum bundist mest í kennslunni. Ollý kenndi okkur mikið fyrsta og annað árið, Sara hefur líka kennt okkur töluvert, Lovísa var með okkur í teyjum og söknuðum við hennar tíma lengi á eftir, Agnes hefur kennt okkur bæði leikfimi og dans, Ellen er nýr kennari við skólann og hefur kennt okkur í vetur og síðast en  ekki síst er það Bára sjálf sem hefur haldið utan um okkur með því að vigta okkur nær vikulega og setja okkur reglurnar.

Þetta er það besta sem ég geri til að halda þreki og heilsu almennt.

Þrjár konur

Þrjár konur voru í Silfri Egils rétt áðan Andrea Ólafsdóttir VG, Ósk Vilhjálmsdóttir Íslandshreyfingin og Erla Ósk Ásgeirsdóttir D. Umræðuefnið var kvennafylgið til Vinstri græna og afhverju það stafaði. Andrea sagði að þeirra fylgi frá konum byggðist á skýrri málefnastefnu í kvenfrelsis og jafnréttismálum ásamt umhverfismálum en Ósk taldi að kvennafylgi til VG væri fyrst og fremst vegna umhverfismála.

Erla sagði að það væri vissulega áhyggjuefni að Sjálfstæðisflokkurinn væri ekki að höfða til kvenna og sagði klárt að það þyrfti að taka á launmismuninum á milli kynja í þjóðfélaginu og hún væri ekki sammála kenningum Heiðrúnar Lindar í þeim efnum.

Ágúst Ólafur Ágústsson sat með þeim fyrir Samfylkinguna og sagði m.a. að Ingibjörg Sólrún hefði sýnt það í verki meðan hún var borgarstjóri að koma á jafnræði í launum borgarstarfsmanna og það hefði ekki verið nokkur vandi fyrir Sjálfstæðismenn að leiðrétta þennan launamismun kynjana í þessi 16 ár sem þeir hafa stjórnað, allt sem þyrfti væri viljinn.  Ágúst lagði ríka áherslu á að velferðarmál væru mál málanna og fólk gæti ekki einungis kosið um umhverfismál í kosningunum.

Erla hafði ekki roð við viðmælendum sínum og held ég að það hafi verið fyrir ákveðið þjálfunarleysi. Henni til vorkunar má segja að þarna var á ferðinni  konur sem greinilega hafa mun meiri reynslu í að koma fram á opinberum vettvangi. En það er ekki þar með sagt að konur eigi ekki að koma fram í þætti eins og Silfri Egils, mér finnst að þátturinn eigi að vinna af því að leyfa nýju fólki að komast að og um leið þjálfast það í umræðum í sjónvarpi.

 

Stelpustund í kvöld á Akranesi!

Stelpukvöld var haldið í kvöld í kosningamiðstöðinni að Skólabraut 28. Þar áttum við góða kvöldstund og ræddum baráttuna framundan. Ákveðið var að hittast í kosningamiðstöðinni á hverju miðvikudagskvöldi kl. 20 fram að kosningum.

Við ætlum að fá til okkar reynslubolta úr pólitíkinni til að koma og stytta okkur stundir og fræða okkur betur.

Næsta mál verður "Fagra Ísland" þar sem Samfylkingin telur að nú sé sérstaklega mikilvægt að rétta hlut náttúruverndar á Íslandi gagnvart hagsmunum stóriðju, sem hefur notið algers forgangs í atvinnustefnu ríkisstjórnarinnar undanfarin áratug.

Það verður spennandi að fara í gegn um þessar tillögur Samfylkingarinnar ekki síst vegna þess að við búum hér í næsta nágrenni við stóriðjur og stór hluti bæjarbúa byggja afkomu sína á þeim. Nú þarf að finna jafnvægið í uppbyggingu atvinnuvega í landinu og hugsa um allt landið í þeim efnum og bæta hag kvenna og stöðva flótta kvenna úr dreifbýli í þéttbýli.

Gaman saman hjá okkur!

x-S(telpur)

Óhugnaður sem erfitt er að horfast í augu við.

Þegar frétt eins og þessi um barnaklám ber fyrir augu manns langar manni helst til að hlaupa yfir þetta og gleyma þessu eða þykjast varla hafa tekið eftir þessu. það er hluti af afneitun sem flestir ef ekki allir glíma við í einhvern tíma lífsferils síns um svo margt sem við upplifum og verðum áskynja.

Ég get ekki betur séð en það þurfi eihverskonar netlöggu! Þar er ég alveg sammála þeim sem fram hafa komið með þá hugmynd um skipulagt eftirlit á netinu með klámi.

Um 30-40% ábendinga barnaklám

Konur í forustu Jafnaðarmanna á Norðurlöndum.

Þrír glæsilegir fulltrúar Danmerkur, Íslands og Svíþjóðar voru saman komnir í gær til að fagna kjöri Monu Sahlin í formannsembætti sænska Jafnaðarmannaflokksins í Stokkhólmi. Ingibjörg Sólrún Gísladóttir formaður Samfylkingarinnar og Helle Thorning formaður Danska Jafnaðarmannaflokksins voru heiðursgestir og fluttu ávarp. Ávarp Ingibjargar er hægt að skoða á Trunó. 

Einnig  er góð færsla frá Erlu Sigurðardóttur í Kaupmannahöfn hér og hér

Litla fjölskyldan í Kaupmannahöfn.

 

                                  MAGNEA, ALDÍS og SINDRI                   

 

                                               

                                                   AUGUN HENNAR MAGNEU

                                               

                                                 NAUÐSYNLEGT AÐ RANNSAKA MÖMMU SÍNA

                                              

                                           GAMAN AÐ FARA ÚT AÐ BORÐA MEÐ PABBA

Þau koma heim 29. mars á miðnætti. Sindri verður í eina viku en Aldís og Magnea í hálfan mánuð.

Nú er Magnea 9 mánaða og 13 daga gömul.  Mikil tilhlökkun að fá þau. 

 

 

                                                  

 

 

 

 

 

Vantar konur á Íslandi?

Í fréttum sjónvarps klukkan 10 í kvöld var viðtal við Valgerði Sverrisdóttur vegna næsta hóps flóttamanna sem Ísendingar ætla að taka á móti. Hún sagði að það stæði til að samsetning hópsins yrðu einstæðar mæður og í síðasta hópi hefði verið töluvert af einstæðum mæðrum.

Nú er það auðvitað til fyrirmyndar að taka á móti einstæðum mæðrum og verða þeim til aðstoðar, en einhvernvegin læddist að mér sá grunur að þarna væri um stjórnsýslu ákvörðun að ræða vegna flótta íslenskra kvenna úr dreifbýli í þéttbýli og þá getur nú verið gott að ná í svona einn hóp af konum (þótt það séu flóttakonur) og planta þeim í dreifbýlið og svo getur alltaf gerst þau undur og stórmerki að þær setjist að og giftist karlpeningi dreifbýlisins (m.a.bændum) sem er yfirgefinn af íslenskum flóttakonum!

Það skyldi þó aldrei vera að Framsókn sé komin með hjónabandsmiðlun? 

Færi ekki betur á því að við byrjuðum í eigin ranni og kæmum í veg fyrir flótta íslenskra kvenna úr dreifbýlinu vegna skorts á atvinnutækifærum og sköpuðum þeim einhverja atvinnu?

Hvað á að gera við Vestfirði á morgun?

Á bloggi Ólínar Torfadóttur hefur hún sagt frá borgarafundi Vestfirðinga í gær um atvinnuástand ið sem hefar skapast þar undan farnar vikur.

 

Og hér er ályktun funarins:

 Opinn borgarafundur, haldinn í Hömrum á Ísafirði sunnudaginn 11. mars 2007, skorar á fulltrúa Vestfirðinga á alþingi og í sveitarstjórnum, hvar í flokki sem þeir standa, að taka höndum saman, leggja flokkspólitísk ágreiningsefni til hliðar og sameinast um þau brýnu úrlausnarefni sem við blasa í atvinnu- og byggðamálum hér á Vestfjörðum.  Fundurinn krefst þess að stjórnvöld standi við marg- ítrekuð loforð og stefnumótun um uppbyggingu Ísafjarðar sem eins af þremur byggðakjörnum utan höfuðborgarsvæðisins. Ennfremur að þessu svæði verði settar sanngjarnar leikreglur með ákvörðunum um nauðsynlegar framkvæmdir í samgöngumálum, tilfærslu opinberra starfa og eðlilegt aðgengi að fjármagni.  Mikið vantar á að þetta landsvæði njóti jafnræðis á við aðra landshluta varðandi samgöngur, fjarskipti, flutningskostnað, menntunarkosti og almenn skilyrði í atvinnulífi.  Beinir fundurinn því til frambjóðenda stjórnmálaflokkanna í Norðvesturkjördæmi að mæta til kosningabaráttunnar nú í vor með haldbærar tillögur um framtíð byggðar á Vestfjörðum.   Við köllum eftir samstöðu þings og þjóðar gagnvart þeim vanda sem Vestfirðingar standa nú frammi fyrir.    

Geir ætlar að ræða málin á morgun.

Ríkisstjórnin mun ræða um vandamál Vestfjarða á morgun

Hvar er þetta kvenmannsleysi Samfylkingarinnar?

Að undanförnu hafa fjölmiðlar verið að birta skoðanakannanir um fylgi flokkanna til alþingiskosninga og hefur fylgishrun Samfylkingarinnar verið stöðugt. Vísbendingar hafa komið fram í könnunum um að konur flykkist yfir á Vinstri Græna. Í bloggheiminum má sjá ýmsar athugasemdir hér og þar um að Samfylkingin sé orðin karlaflokkur og ekkert nema karlar á listum og Ingibjörg ein að rogast með karlastóðið á eftir sér. Ekki hefur heldur vantað yfirlýsingar þess efnis að Vinstri Græn séu eini femínista flokkurinn.

En lítum á staðreyndir. Í landinu í dag eru sex kjördæmi og yfirleitt í kringum 20 manns á hverjum framboðslista innan kjördæmis (eða frá 18 upp í 24). Hjá báðum þessum flokkum er yfirleitt jöfn skipting milli kynja á listunum. Undantekningarnar eru Reykjaneskjördæmi hjá Samfylkingunni þar sem 11 konur eru á lista á móti 13 karlmönnum og hjá Vinstri Græn er það öfugt í sama kjördæmi eða 13 konur og 11 karlar.

Samtals í framboði fyrir hvorn lista eru 126 og þar af 62 konur fyrir Samfylkingu og 66 konur fyrir Vinstri Græn í öllu landinu.

Af þessum sex kjördæmum er aðeins ein kona Ingibjörg Sólrún Gísladóttir í fyrsta sæti fyrir Samfylkinguna og er það miður að ekki skulu vera fleiri konur í fyrsta sæti. Þetta er niðurstaða prófkjörs.

Hjá Vinstri Græn eru aðeins tvær konur í fyrsta sæti eða Kolbrún Halldórsdóttir fyrir Rvk.-s. og Katrín Jakobsdóttir fyrir Rvk.-s.  Hjá þessum flokki Vinstri Græn er raðað á lista og fleiri konur samtals á listunum en karlmenn - en samt!

Af hverju?

10 mars 2007.

 

Gyða systir mín á afmæli í dag. Til hamingju með afmælið.

Hún er ein af þeim konum sem hefur átt þátt í að brjóta niður múra í hefðbundnu karlasamfélagi sem var um borð í stóru millilandaskipi Fjallfossi árið 1975 á Kvennafrídaginn.

Hún fór sem ung stúlka í vinnu sem skipsþerna og voru þær þrjár skipsþernurnar sem voru um borð á þessum tíma. Þær lögðu niður vinnu þennan afdrifaríka dag og lokuðu sig af í káetum sínum í mikilli óþökk skipsfélaga og háðsglósur dundu á þeim allan daginn fyrir ósvífnina. Svo hart var að þeim gengið að samstarfsstúlkur systur minnar voru margoft við það missa móðinn og vildu snúa aftur til vinnu sinnar. Systir mín stóð keik við sitt og hvatti þær. Systir mín komst út úr káetunni nær óséð og upp til loftskeytamanns og lét hann senda skeyti frá þeim á Lækjartorg með baráttukveðjum í tilefni dagsins. Loftskeytamaðurinn var víst ekki sáttur við sendinguna en lét undan systur minni enda er hún mikill karakter og ekki hægt að neita henni um neitt ef því er að skipta.

Skeytið vakti mikla athygli og fékk mikla hyllingu kvenna á Lækjartorgi. Um kvöldið var sendur sendiboði frá skipstjóranum um  að þær ættu að koma upp til hans og tala við hann. Þær urðu auðvitað skelkaðar og voru svosem búnar að áætla það að þær myndu fá tiltal ásamt allri vatnsgusunni sem var búið hella yfir þær frá skipsfélögum allan daginn.

Þegar þær koma inn til skipsstjórans er hann bjartur yfirlitum og búin að taka fram glös, vín og konfekt og tilkynnir þeim að hann hafi fengið símtal frá konu sinni (sem var nú heldur meira mál en í dag) og hún hefði spurt hann hvaða kjarnakonur hann hefði eiginlega um borð hjá sér, því skeytið frá þeim hefð vakið einna mest athygli fyrir það í raun, hvar konur voru að vinna við misjafnar aðstæður þennan dag.

Hann skálaði við skipsþernur sínar og þakkaði þeim þessa baráttu. Eftir það varð minna eða ekkert um háðsglósur samstarfsfélaganna. Nú voru þær hetjur.

Konur standið saman og ekki láta karla hafa áhrif á það sem þið hafið ákveðið.